O'pflstrudl - Wias geht

 

Vo 30 bis 35 Deka Möh', 50 ml Ö', a bissl Soiz, oan Oa und ungfa' 125 ml lauwoarms Wossa mochst an net zu festn Toag. Gut knetn damit a si guat vaoarbatn losst. Is des gschegn, mochst a Kugl ausn Toag, tuast as mi Ö' o'pinsln und deckst as zua mit ana angwarmtn Schissl. Noch ana hoibn Stund nimmst a neiche woarme Schissl zum zuadeckn.

Dawei da Toag rostn tuat schö'st an Kilo saure Äpfl (host richtig glesen, saure Äpfl) und schneidst as fei blattri'.

Da Toag suit si jetzt sche ziagn lossn. Jetzt nimmst a Tiachl, a oits Lei'tiachl is grad recht, staubst Möh' drauf und ruist den Toag aus bis a schena Fleck do liagt. Jetzt nimmst die Finga und tuast vursichti den Toag ausziagn. Hoit! In Toag hob i gsagt und net di! Ja, wanns in da Kuchl wirkli so woarm ist, dann legst hoit wos o'. Ganz dinn muass a werdn dei Toag dass ma a Zeidung durch lesn kennt. Wannst as probiern wuist dann wicklst di Zeitung vurher in Plastik ei' damit da Toag net schwoarz wird vo da Truckatintn. Nimm ruhig die Seitn mit de Witz, daonn host wos zum lochn.

Hiaz kemman die Äpfl aufn Toag, vurher tuarst woarme Butta aufn Toag drauf spritzn, Zucka, Wei'bearl und Bresl kemman a no aufi. Zimt kannst a nemma wannst as mogst.Wannst des ois host, kannst den Toag ei'ruin. Oba net mit da Zeidung, des gibt an komischn Gschmok! Zum Ei'ruin greifst afoch des Tiachl und ruist amoi drei Viertel ei'. Hiaz schlogst die Endn vom Toag ei' und ruist weida.

Jetza kimmt da Strudl aufs ei'gfettete Bockblech, wird urndli mit woarma Butta ei'gstrichn und kimmt ins Rohr. Tuast eam bei 170 Grad für a guade hoibe Stund bockn oda hoit so lang bis a a schene Foarb hat.

Wann da Strudl ferti is, kimmt a außa ausn Rohr und derf a bissl rostn. So 15 Minuten glanga. Jetzt derst da a Stickl obaschneidn, tuast an Staubzucka drauf und losst das schmeckn.

Wannst des Leitiachl vom Bett gnumman host dann tat is woschn bevurs di wieda eini legst. Sunst schaust aus wia a Saubatl am nächstn Tog.

Buidln dazua finst auf da Seitn mitn normalen Deitsch

 

top

STEIRERHUT steirerhutgross RESTAURANT